Zonyon Dilin

 Zonyon delis: Zonyon dilin 

Non syantifik: Pancratium Caribeum

Fransè: oignon 🧅 de Lys, Lilly blanc, Lis blanc, Pancratier blanc, Pancrais des Antilles 

Ansyen yo te konn itilize l pi souvan men jenerasyon jodiya preske pa konnen l. Anpil moun souvan rele l zonyon dilin (de lys), lè konsa anpil moun pa konn ki kalite zonyon y ap pale. Li diferan ak zonyon popilè nou itilize nan kizin ayisyen an: zonyon (Allum Cipa). 

Si w gen maleng ki pa vle geri, ou graje de twa zonyon dilin, ou mete l masere nan lwil maskreti oswa lwil olive extra vyèj pandan 3 jou, ou fin lave maleng nan ak yon ti dlo pèmaganat, lese l seche pou kont li epi ou pase l sou li kou pomad, l ap panse l byen vit. Bay moun nan enfizyon bab panyòl oswa ji militon blan graje 3 fwa pa semèn nan maten ajen, sote jou. 

Menm pat zonyon delis la melanje ak lwil maskreti oswa oliv la, ou ka fè ti chofe l tou piti, lese l tyèd pou w itilize kont zòrèy fè mal. 

Si yon moun vle rann yon pwazon, oswa vomi yon bagay ou ka bwè 1 ti gode enfizyon zonyon delis la: koupe yon bò ki mwens pase yon mwatye zonyon, koupe l an ti moso pi piti epi mete tranpe nan yon demi gode dlo cho pandan 7 minit. Bwè l apre sa epi souke vant ou byen souke. Ou ka fè sa ant 3-4 fwa si w poko vomi. Si w vle l pi efikas ou ka itilize poud moutad (se pa miskad non) pou ka vomi po rapid. 

Grenn anfle, varikosèl, timè: Nan Medsin popilè ayisyen an tou, nou konn graje zonyon delis la, melanje l ak lèt bèf frèch plis mi biswit oubyen pen oswa kabich, ou bouyi l sou ti dife lan pandan w ap fè ti branche l pou l vin ba w yon pat. Veye pou l pa boule. W ap itilize yon moso twal blan pwòp, mete pat zonyon delis la landan l pou w depoze sou pati ki afekte a. Menm dòz sa bon pou emowoyid tou men pou konn lòt dòz ou efikas sou emowoyid.